అంతర్జాలంలో అ..ఆ..ఇ..ఈ! (Eenadu Eetaram_22/12/12)

ఎవరన్నారు? తెలుగు కనుమరుగవుతోందని...ఎవరన్నారు?? తెలుగులో చదివితే ఉద్యోగాలు కరవవుతాయని...ఇది ఒట్టి అపోహ, భ్రమే! అంటున్నారు టెక్‌ నిపుణులు...పైపెచ్చు... భవిష్యత్తులో ఆన్‌లైన్‌ తెలుగుమయం...అంతర్జాలం కొలువుల నిలయం... ఇది ఖాయం అని సెలవిచ్చేస్తున్నారు...ప్రపంచ తెలుగు మహాసభల సందర్భంగా ఆ సంగతుల సమాహారం. ఆన్‌లైన్‌ వెలుగులకు శ్రమిస్తున్న కొందరు యువ తరంగాల పరిచయం. కంప్యూటర్‌, ఆన్‌లైన్‌, అంతర్జాలం అనగానే గుర్తొచ్చేది ఆంగ్లమే. ఇదంతా గతం. పరిస్థితులు మారుతున్నాయి. స్థానిక భాషల ప్రాభవం మొదలవుతోంది. అందులో తెలుగు భాష సైతం తన స్థానం పదిల పరుచుకుంటోంది. ఇది అత్యయిక పరిస్థితి. అందుకే గూగుల్‌, ఫేస్‌బుక్‌, యాహూలాంటి దిగ్గజాలు ముందే మేలుకున్నాయి. తెలుగు, తమిళం, హిందీ, మరాఠీ, కన్నడమంటూ స్థానిక భాషలకు తమ సేవలు విస్తరిస్తున్నాయి. యువతలో భాగమైన ఫేస్‌బుక్‌ సైతం తెలుగును ప్రోత్సహిస్తోంది. ఫలితమే నిత్యం లక్షలమంది తమ చాట్లాటలు, అభిప్రాయాల్లో అలవోకగా తెలుగు అక్షరాల్ని వినియోగిస్తున్నారు. ఫేస్‌బుక్‌ని పోలిన వూక్‌స్టర్‌లాంటి సామాజిక అనుబంధాల వెబ్‌సైట్లు అయితే అచ్చంగా తెలుగు భాష, వ్యక్తులకే పట్టం కడుతున్నాయి. సెల్‌ఫోన్‌ కంపెనీలు సైతం ఎప్పుడో తెలుగు బాట పట్టాయి. తెలుగు భాష, అప్లికేషన్స్‌ (యాప్స్‌)ని అందుబాటులోకి తెచ్చాయి. ఇక బ్లాగుల సంఖ్య చెప్పనక్కర్లేదు. మనసు పొరల్లోని భావాలకు అక్షర రూపమిచ్చే తెలుగు బ్లాగుల సంఖ్య దాదాపు పదివేల వరకు ఉంటుందంటారు వివెన్‌. రాష్ట్ర ప్రభుత్వ ఐటీ శాఖ అంతర్జాల సలహామండలి సభ్యుడు. 'రాష్ట్రంలో ఆంగ్లంపై పట్టున్నవారు పది శాతమే. తెలుగు సాఫ్ట్‌వేర్లు, నిర్వహణ వ్యవస్థలు, ఫాంట్లు అభివృద్ధి చెందితే తొంభై శాతం ఆన్‌లైన్‌ ప్రక్రియ తెలుగుమయం అవుతుంది. భాష వికసిస్తుంది. ఉద్యోగాలు వెల్లువెత్తుతాయి' అంటూ విశ్లేషిస్తున్నారు. ఈమధ్య ప్రభుత్వం వైపు నుంచి కూడా ప్రోత్సాహం మొదలైంది. ప్రభుత్వ లావాదేవీలు కూడా ఆన్‌లైన్‌కెక్కితే తెలుగు పరిమళాలు మరింత వెదజల్లుతాయి. అజంత భాష అంతర్జాలాన్ని చుట్టేస్తుంటే భాషా నిపుణులు, కొలువులకు గిరాకీ పెరగకుండా ఉంటుందా? 'ఇప్పటిదాకా ఐటీ కంపెనీలు కార్పొరేట్‌ సంస్థల కోసం పనిచేశాయి. ఇప్పుడిక సామాన్యుల అవసరాలపై దృష్టి సారించే సమయం మొదలైంది. దీంతో వేల సంఖ్యలో ఉద్యోగాలు పుట్టుకు రావడం తథ్యం' అంటారు నల్లమోతు శ్రీధర్‌. 'కంప్యూటర్‌ ఎరా' సంపాదకులు. కుడి నుంచి ఎడమకు రాసే ఉర్దూ, కింది నుంచి పైకి రాసే జపనీస్‌ లాంటి భాషలు సైతం తమకంటూ ప్రత్యేక సాంకేతిక పరిజ్ఞానం, సాఫ్ట్‌వేర్లు, వెబ్‌సైట్లు అభివృద్ధి చేసుకుంటుంటే తెలుగులో అది ఎందుకు సాధ్యం కాదంటారు వాళ్లు. ఈమధ్య కాలంలో ఇదే తరహా సానుకూల పరిణామాలు ఎక్కువయ్యాయి. గతంలో కంప్యూటర్‌లో తెలుగు రాయాలంటే అదో క్లిష్టమైన ప్రక్రియ. నిర్వహణ వ్యవస్థ (ఆపరేటింగ్‌ సిస్టమ్‌)లు సహకరించేవి కాదు. ఇప్పుడా పరిస్థితి మారింది. 'యుబుంటు', విండోస్‌ ఎక్స్‌పీ, 7, 8 ఓఎస్‌లను రెండే నిమిషాల్లో తెలుగు ఓఎస్‌లుగా మార్చొచ్చు. తెలుగుకు సహకరించేలా చేయొచ్చు. కొందరు యువ నిపుణులు బ్రౌజర్లను సైతం తెలుగులోకి అందుబాటులోకి తెచ్చారు. తెలుగు ఖతులు (ఫాంట్లు), తెలుగు వికీపీడియా ఆన్‌లైన్‌లో అందుబాటులో ఉన్నాయి. ఇదంతా తెలుగు భాషాభిమానులు వ్యక్తిగతంగా ఏళ్లకేళ్లు శ్రమించి చేసిన కష్టానికి ప్రతిఫలం. పెద్ద సంస్థలు ఇదే పనికి పూనుకుంటే భాషా నిపుణులు, సాఫ్ట్‌వేర్‌ డెవలపర్లు, సాంకేతిక నిపుణుల రూపంలో వేలమందికి ఉద్యోగాలు దక్కే అవకాశం. ఫేస్‌బుక్‌ వారధి వికీపీడియాను తెలుగీకరించే పనిలో ఉన్నాడు ఖమ్మం కుర్రాడు కట్టా విజయ్‌. ఓవైపు సాఫ్ట్‌వేర్‌ ఇంజినీర్‌గా పనిచేస్తూనే తెలుగు భాషపై మమకారాన్ని ఇలా చాటుకుంటున్నాడు. ఆన్‌లైన్‌లో తెలుగు ప్రచారం నిర్వహిస్తూ 'ఈ తెలుగు' అనే సంస్థ ద్వారా తెలుగు సాఫ్ట్‌వేర్లపై నెటిజన్లకు అవగాహన కల్పిస్తున్నాడు. ఫేస్‌బుక్‌లో తెలుగు అక్షరాలు కనిపించడంలో ఈ యువకుడిది కీలక పాత్ర. ఫేస్‌బుక్‌, వర్డ్‌ప్రెస్‌, లినక్స్‌లో పలు తెలుగు అనువాదాలు చేశాడు. ప్రస్తుతం తెలుగు టైపింగ్‌ సాఫ్ట్‌వేర్‌ను అభివృద్ధిచేసే కార్యక్రమంలో నిమగ్నమై ఉన్నాడు. అంతర్జాలంలో తెలుగు భాష వ్యాప్తికి పాటుపడుతున్న కొందరు యువతరంగాలు.. వారి ఆవిష్కరణలు. భాషాభిమాని విజయవాడ కుర్రాడు రెహ్మానుద్దీన్‌కి భాషాభిమానం ఎక్కువ. ఇంజినీరింగ్‌ చదివే రోజుల్లో సాంకేతిక రంగంలో తమిళ, మలయాళ భాషలు దూసుకెళ్లడం గమనించాడు. వాటికి దీటుగా తెలుగు అభివృద్ధి చెందాలని తపించాడు. కొన్నేళ్లు శ్రమించి ఆన్‌లైన్‌ భాషాభిమానుల్ని ఒక్కచోటికి చేర్చే కార్యక్రమం చేపట్టాడు. అలా 'తెలుగు స్పెషల్‌ ఇంట్రెస్ట్‌ గ్రూప్‌'మొదలైంది. దానికి అధ్యక్షుడిగా కొనసాగుతూ 'తెలుగు స్పెల్‌ చెకర్‌', 'ఆప్టికల్‌ క్యారెక్టర్‌ రికగ్నేషన్‌' అనే సాఫ్ట్‌వేర్లు అభివృద్ధి చేస్తున్నాడు. ఇవి విజయవంతమైతే ప్రతి పుస్తకాన్నీ స్కాన్‌ చేసి.. అందులోని అక్షరాలను కంప్యూటర్‌లో నమోదు చేసేందుకు వీలవుతుంది. ఫాంట్ల సృష్టికర్త ఆసక్తి ఎంతటి సమస్యకైనా పరిష్కారం చూపించగలదనడానికి సాక్ష్యం చావా కిరణ్‌. వజ్రం, స్వర్ణ, సంహిత అనే తెలుగు ఫాంట్ల సృష్టికర్త ఇతడు. తెలుగు బ్లాగర్ల గ్రూపు ఏర్పాటు చేసి ఆన్‌లైన్‌లో ప్రచారం చేస్తున్నాడు. రంగులు, పూల పేర్లను తెలుగులో నేర్పించడానికి పిల్లల కోసం రెండు ఉచిత ఆండ్రాయిడ్‌ అప్లికేషన్లు రూపొందించాడు. చరిత్ర, సాంకేతిక అంశాలపై వికీపీడియాలో వందల వ్యాసాలు రాశాడు. 'ఈ తెలుగు' వ్యవస్థాపకుల్లో ఒకడు. మాటల్ని రాతగా, రాసింది శబ్దంగా వెలువడే సరికొత్త సాఫ్ట్‌వేర్‌ రూపొందించే పనిలో ఉన్నాడు. కిరణ్‌ సొంతూరు ఖమ్మం. నేను సైతం... తెలుగు చదవడం, రాయడం రాదు. అయినా తెలుగంటే మమకారం. చెన్నైలో ఉన్నపుడు సహోద్యోగులు తమకు అనుకూలమైన ఫాంట్లు అభివృద్ధి చేసుకోవడం గమనించాడు. అప్పట్నుంచి నేనూ ఎందుకు చేయకూడదనే ఆలోచనలో మొదలైంది. కేడీఈ అనే ప్రాజెక్ట్‌ చేపట్టాడు. ఆన్‌లైన్‌ నుంచి ఉచితంగా డౌన్‌లోడ్‌ చేసుకోగలిగే ఆపరేటింగ్‌ సిస్టమ్స్‌, సాఫ్ట్‌వేర్లను తెలుగులోకి మార్చే ప్రాజెక్ట్‌ మొదలు పెట్టాడు. ఫ్యూయెల్‌ ప్రాజెక్ట్‌లో భాగంగా కంప్యూటర్‌ సాంకేతిక పదాలను తెలుగులోకి అనువదిస్తున్నాడు. ఫొటో ఎడిటింగ్‌కు పనికొచ్చే గింప్‌ సాఫ్ట్‌వేర్‌ను తెలుగులోకి మార్చిన వ్యక్తుల్లో ఖమ్మం వాసి పవిత్రన్‌ ఒకడు. ఉచిత సేవలు 'ఆన్‌లైన్‌లో మీకు ఏ సమస్య ఎదురైనా పరిష్కరించే బాధ్యత నాది' అంటున్నాడు అమలాపురం కుర్రాడు ప్రవీణ్‌ ఇళ్లా. హైదరాబాద్‌లో ఐటీ ఉద్యోగం చేస్తూనే ఆంగ్ల సాఫ్ట్‌వేర్లను తెలుగీకరిస్తున్నాడు. వి.ఎల్‌.సి. మీడియా ప్లేయర్‌, యుబుంటు, డెబియన్‌ ఓఎస్‌లను పూర్తిగా తెలుగులోకి మార్చాడు. కంప్యూటర్లలో తెలుగు సాఫ్ట్‌వేర్లు మొరాయించినా, ఫాంట్లు సరిగా పనిచేయకపోయినా సంబంధిత అభివృద్ధిదారుని సంప్రదించి.. ఆ లోపాలను ఉచితంగా సవరిస్తున్నాడు. తన తెలుగు లినక్స్‌ బ్లాగ్‌తో సందేహాలు నివృత్తి చేస్తున్నాడు. - వేణుగోపాల్‌ బొల్లంపల్లి,  ఈనాడు: హైదరాబాద్‌

Eenadu Direct Link: http://eenadu.net/Specialpages/etharam/etharaminner.aspx?qry=sp-etaram1