Eenadu Eetaram (28/04/2012)
 ఆశ్చర్యంగా ఉన్నా నిజం. మన దేశంలో ఎయిడ్స్‌, గుండె జబ్బులు, క్యాన్సర్‌ లాంటి రోగాల వల్ల కంటే ఆత్మహత్యలతోనే ఎక్కువ మంది చనిపోతున్నారు. తొంభై నిమిషాలకో టీనేజీ అమ్మాయో, అబ్బాయో ఆత్మహత్య ప్రయత్నం చేస్తున్నారు. ప్రతి ఐదు గంటలకు ఒకరు చివరి మజిలీ చేరుకుంటున్నారు. ముప్ఫై నాలుగేళ్ల లోపు యువతను తీసుకుంటే ఆ సంఖ్య ఏడాదికి లక్ష. వీరిలో ఇరవై ఆరువేల మంది చదువుల ఒత్తిడి, పరీక్షల్లో ఫెయిలైన పసిమొగ్గలే. నేషనల్‌ క్రైమ్స్‌ రికార్డ్స్‌ బ్యూరో చెబుతున్న గుండెలు పిండేసే లెక్కలివి.వైఫల్యం చింతను మోసుకొస్తుందనేది నిజం. కానీ తేరుకుని కారణాలు విశ్లేషించుకోవాల్సింది పోయి, నిరాశలో కూరుకుపోయి జీవితాన్ని ముగించాలనుకోవడం అవివేకం! 'చదువులో ఫెయిలైతే జీవితమే శూన్యం అనుకునేవాళ్లే ఇలా చేస్తారు' అంటున్నారు కౌన్సిలింగ్‌ సైకాలజిస్ట్‌ వీరజారావు. ఇంటర్‌లో తొంభై ఏడు శాతం మార్కులు సాధించిన ఓ అమ్మాయి ఇంజినీరింగ్‌లో ఒక్క సబ్జెక్టులో ఫెయిలైందని ప్రాణం తీసుకుంది. మరో అమ్మాయి పరీక్షల్లో ఫెయిలవుతానని భయపడి ఫలితాలకు ముందే ప్రాణం తీసుకుంది. తీరా చూస్తే ఫలితాల్లో పాస్‌. 'నేటి యువత తమను తాము ఎక్కువగా అంచనా వేసుకుంటున్నారు. అందువల్ల వాస్తవాన్ని జీర్ణించుకోలేని స్థితిలో పడిపోతున్నారు. ప్రణాళిక బద్ధంగా ముందుకు సాగకపోవడం, పోల్చి చూసుకోవడం, ఓటమిని అవమానంగా భావించడం, నలుగురూ ఏమనుకుంటారోననే భయం... ఇలాంటి కారణాలెన్నో అఘాయిత్యాలకు కారణమవుతాయి' అంటూ విశ్లేషిస్తున్నారు మరో సైకాలజిస్టు డాక్టర్‌ విశ్వనాథ్‌.రెండు రకాలు డాక్టర్‌ విశ్వనాథ్‌ అభిప్రాయంలో ఆత్మహత్యకు ప్రయత్నించే వ్యక్తులు రెండు రకాలు. మొదటి రకం వాళ్లు ఫెయిలవ్వగానే విపరీతంగా ఒత్తిడికి గురవుతారు. ఏడుస్తారు. ఆ భావనల నుంచి త్వరగా బయటపడలేరు. చచ్చిపోతే నయమనే భావాలు వెల్లడిస్తారు. తమని తాము గాయపరుచుకోవడం కూడా చేస్తారు. నిజానికి వాళ్లు చనిపోవాలో, వద్దో తేల్చుకోలేని సందిగ్ధావస్థలో ఉంటారు. రెండోరకం వాళ్లలో చనిపోవాలనే దృఢ నిర్ణయం ఉంటుంది. వాళ్ల నడత, తీరులను సునిశితంగా పరిశీలిస్తే తప్ప గ్రహించలేకపోవచ్చు కూడా. తల్లిదండ్రులు, స్నేహితులు వారి ప్రవర్తనను అంచనా వేయడానికి ప్రయత్నించాలి. లక్షణాలివే! * తీవ్ర మానసిక ఒత్తిడి * ఒంటరితనం కోరుకోవడం *చావు గురించి తరచూ మాట్లాడ్డం * ప్రమాదకర వస్తువుల సేకరణ * ఎవర్నీ లెక్కచేయని మనస్తత్వం *దైనందిన కార్యక్రమాలపై నిరాసక్తి * అతి నిద్ర, నిద్రలేమి *పెండింగ్‌ పనులు ముగించాలనే ఆతృత * దేవుడిపై నిందలు వేయడం * నేనెందుకూ పనికిరాననే భావజాలం. ఏంచేయాలి? ఒత్తిడిలో ఉన్నట్టు కనిపిస్తే వారిని ఒంటరిగా వదల కూడదు. ఆత్మీయ స్పర్శ, సాంత్వన కలిగించే మాటలు వాళ్ల మనసు మార్చొచ్చు. ముందు వాళ్లు చెప్పేది శ్రద్ధగా వినాలి. విమర్శలు మనసుని మరింత గాయపరుస్తాయి. ఇంతకు ముందు వాళ్లు సాధించిన విజయాలు గుర్తు చేయాలి. ప్రొఫెషనల్‌ సైకాలజిస్టును సంప్రదిస్తే మంచిది. ఆదుకునే నేస్తం తమ బాధను ఎవరికి చెప్పుకోవాలో తెలియని అయోమయస్థితిలో ఉన్న యువతకు చేయూతనిస్తోందో సంస్థ. వివరాలు గోప్యంగా ఉంచుతారు. కళావతి నివాస్‌, సింధీ కాలనీ, సికింద్రాబాద్‌. ఫోన్‌ నెంబర్లు: 040-66202000, 040-27848584 
|
.JPG)
కామెంట్‌లు
కామెంట్‌ను పోస్ట్ చేయండి